​💥 "مراتي دخلت عليا المطبخ وبكل ثقة أعلنت إن عيلتها كلها—خمسة وعشرين فريد—حيقضوا أسبوع العيد كله في بيتي، وكانت مستنية مني أطبخ، وأنظف، وأخدمهم، وأنا مبتسمة زي الشغالة. بصيت لها بكل برود وقلت: "تمام.

أفرد الورق قدامهم واحد ورا التاني
فواتير كروت الائتمان المخفية.
إنذارات القروض الشخصية.
شات مطبوع بينها وبين واحد اسمه سامح من البنك ..
صور شاشات ومستندات.
مقايسة مضروبة ومزورة لتوضيب البيت وتغيير الديكور باسم عنواني أنا.
وتوكيل عام رسمي متفبرك مسودة.
ورقة مطبوعة من شات بسنت كاتباه لسامح اشغل رامي وخليه ملهي في الشغل لحد العيد.. أول ما الحاجّة توافق وتمضي قدام الناس كلها، حنقول إن دي كانت هديتها لينا.
رامي مسك الورقة دي، وإيديه كانت بترتعش زي الورقة الشجر مين سامح ده؟
وش بسنت بقى زي الأموات محدش.
البيت نزل عليه سكوت قاتل، لدرجة إن دقات ساعة الحائط كانت طالعة كأنها بتدين المكان.
رامي انهار على الكرسي. في اللحظة دي، مكنش رامي الزوج.. كان رامي ابني الصغير.. مكسور، وتايه، وموجوع.
أنا مفرحتش؛ ودي الحاجة اللي الناس مابتفهمهاش عن العدالة جوة العيلة.. مبيبقاش طعمها حلو، بيبقى طعمها زي المر اللي بتفضل لوعته في لسانك.
بسنت حاولت تمد إيدها وتخطف الفاتورة، بس شلتها بسرعة وقلت لها حاسبي.. النسخ الأصلية مع المحامي بتاعي.
لفت عليا وزعقت أنتِ كنتِ بتستغفليني وبتتجسسي عليا؟
رديت لأ.. فواتيرك اللي مش مدفوعة هي اللي كانت بتيجي على عنوان بيتي، وكدبك هو اللي خبط على بابي.. أنا بس فتحت الباب.
رامي همس وهو باصص للأرض بسنت.. الكلام ده صح؟
بصت له.. وبعدين لأمها.. ولعمها.. وفي الآخر بصت لي، والماسك اللي كانت لابساه خمس سنين وقع واتدشدش.
قالت بجاحة آه.. صح! الأتيليه فشل والديون كترت وسامح ساعدني. وأنت يا رامي مكنتش حتفهم ولا حتستوعب. وأمك قاعدة في بيت يسوى ملايين وبتعاملنا كأنها بتشحتنا لما بتسيب لنا أوضة نقعد فيها!
رامي اتنفض مكانه، وقلت لها أنا أوضة؟ أنتِ مكنتيش عايزة أوضة.. أنتِ كنتِ عايزة تملّك وسيطرة.
ردت وعينيها بتطلع شرار وإيه الغلط في كدة؟ أنا اللي ممشية البيت ده، أنا اللي بستقبل الناس وبلمهم، أنا اللي عامله لكم برستيج ووش اجتماعي قدام الناس وبسبب صوري وفيديوهاتي الناس فاكرة إننا عيلة مثالية محترمة!
ضحكت.. ضحكة تعب وسخرية يا بنتي.. البيت ده كان محترم وصاحبه راجل محترم من قبل ما حساب إنستجرام بتاعك يتولد أصلاً.
أم بسنت قربت مني وربطت إيدها ورجتني حاجّة كامليا.. عشان خاطري سامحيها.. البنت غلطت، بس لو الموضوع ده طلع برة وعيلتنا سيرتها بقت على كل لسان حنتخرب.
بصيت لها وقلت أنتِ كنتِ عارفة؟
عيطت أكتر ودورت وشها.. وده كان كفاية كإجابة.
رامي وقف وقال ماما...
كنت عارفة النبرة دي.. نبرة الراجل اللي جاي يطلب من أمه تستحمل وتطمطم على الفضيحة عشان شكله قدام الناس والمنظرة.
قلت له قبل ما يكمل لأ.
قفل بؤه.
مفيش طبطبة ومفيش شيل شيلة حد تاني.. مش حشيل ذنب مراتك، ولا ذنب أهلها، ولا برستيجك المضروب، ولا كدبتكم إنني ست نكدية ومفترية عشان برفض اتركب واستغل.
بسنت مسحت دموعها بغل وقالت يعني حتعملي إيه؟ حتطردينا في أيام العيد؟ وتخلي الجيران يتفرجوا علينا؟
قفلت الدوسيه وقلت لها لأ.
بربشت بعينيها وظنت إن فيه أمل.. مسكينة، مكنتش تعرف إن الستات الكبار في السن ممكن يكونوا حنينين وجلادين في نفس الوقت.
قلت لها أنا مش حطرد حد في العيد.. الخمسة وعشرين فريد بتوعك يفضلوا قاعدين هنا ومنورين.
رامي وبسنت بصوا لي باستغراب، فكملت كلامي لكن.. من اللحظة دي، أي بني آدم في البيت ده حيشمر إيده ويشتغل. طبخ، تنظيف، غسيل، فرش، مواعين. أنا مش حرفع معلقة من على الأرض إلا لو كانت تخصني لوحدي.
بسنت سخرت ده كلام تهريج.
قلت لها اللي مش عاجبه الباب يفوت جمل.
محدش تحرك. لفيت وشي لقرايبها اللي كانوا قاعدين في الصالة مكسوفين ومش طايقين نفسهم وقلت لهم يا جماعة.. إنتوا كنتوا معزومين على عيد مثالي.. بس اتعزمتوا في بيت الحقيقة. شوفوا بقى حتاكلوا بلقمتكم بكرامة وتساعدوا، ولا حتمشوا جعانين؟
عدت ثواني محدش بيتحرك فيها، وفجأة حصلت حاجة مكنتش متوقعاها. خالة بسنت الكبيرة وقفت، قلعت الغوايش الذهب من إيدها وحطتها على الترابيزة وشمرت كمام عبايتها وقالت المطبخ منين يا حاجّة؟
بسنت صرخت خالتو!
خالتها بصت لها بنظرة تموت أنا ربيت أربع عيال وفتحت بيت وشقيت.. مش جاية هنا عشان أشوف ست كبيرة ووقورة بتتعامل معاملة الشغالات في بيتها!
خالتها الثانية وقفت.. ومرات عمها حسين.. وتلاتة من بنات خالاتها.
وخلال نص ساعة، المطبخ كان مليان ستات. مكنش فيه ضحك ولا فرفشة في الأول؛ كانوا شغالين بكسوف وإحراج، بس بيشتغلوا.
الرز اتغسل.. الخضار اتقطع.. العيال انضربت عشان تلم الشيبسي اللي رموه في الصالة.
واحدة بتكنس، وواحدة بتفرش السراير، وواحدة نزلت تشتري لبن وحاجات ناقصة.
لأول مرة من خمس سنين، قعدت في صالون بيتي حاطة رجل على رجل، والناس بتلف حواليا بتدور على الملاعق والحلل. مكنتش ضايعه ولا بقول لهم دي فين ودي فين.. سيبتهم يخبطوا.
الرز طلع معجن شوية.. الطبيخ طلع حامي ومشطشط.. والمحشي شاط من تحت.
ومع ذلك، ده كان أهدى وأجمل أكل دخل بؤي من سنين، لأن محدش طلب مني أقف فوق دماغه بالكبشة وأغرف له.
بسنت ماكلتش؛ قعدت في ركن لوحدها، ماسكة تليفونها ببرود وبتكتب رسايل كنت مخمنة هي لمين.
الساعة 1140 بالليل، المحامي بتاعي وصل.. الأستاذ شاكر. راجل شعره أبيض، صوته واطي، وعينيه حادة بتقرأ البني آدم وتعرف كدبه.
سلم رامي إنذار رسمي.. وسلم بسنت نسخة.. وحط ورقة قدامي ومضيت عليها.
بسنت قربت وقالت إيه الورقة دي؟
قلت لها وصيتي الجديدة.
رامي رفع رأسه ماما...
كملت إمضاء وقلت البيت ده مش حيتنقل ملكيته تلقائياً لحد بعد عمري. بعد وفاتي، البيت حيدخل في مؤسسة رفعت وكامليا الخيرية لرعاية الأيتام. أنت يا رامي ليك حق تعيش هنا طول ما أنت محترم وتصرفاتك المالية شفافة وواضحة. وبسنت ليها حق تقعد هنا بشرط واحد ميكونش ضدها أي قضية نصب أو احتيال مالي، وملهاش أي حق في المطالبة بالملكية.
بسنت وقفت وصوتها حتطلع من حنجرتها أنتِ مش من حقك تعملي كدة!
بصيت لها وقلت أنا عملت خلاص.
شفايفها ترعش ولو رامي جاب عيال؟
قلت لها أحفادي ليهم برامج تعليم وتأمين محترمة.. بس ملهمش حكم على العقار والملك.
ضحكت بمرارة يعني بتعاقبي عيال لسه مجوش الدنيا؟
قلت لها لأ.. أنا بحميهم من طمع الكبار.
عمها حسين وقع كشاهد على الوصية.. وخالتها كمان وقعت جنبه. وده اللي كسر بسنت بجد.. مش إمضائي أنا، إمضاء أهلها هما.
على نص الليل، العيد بدأ. مفيش زينة، مفيش سهر برة، مفيش أغاني. كان فيه بس بيتي القديم، وناس تعبانة، والحقيقة قاعدة وسطنا كأنها ضيف تقيل زيادة.
رامي دخل المطبخ وبدأ يغسل المواعين بنفسه لأول مرة من يوم ما اتجوز. كنت واقفة في الطرقة وببص عليه وهو ميعرفش. كان حركته بطيئة ومش متعود، بس كان بيغسل كل طبق بضمير وبينظفه كويس.
دي كانت حاجة.. مش كفاية، بس بداية حاجة.