سلفتى عايرتنى يوم سبوع ابنها ادام الناس انى مبخلفش فقررت اخلص منها

خدي بالك من ابنك.. فيه عين مرصودة عليه. أميرة بدأت تتوتر وتخاف وتكلبش في ابنها. وبدأت أحكى حكايات وأنا قاعده ادامها هى و حماتى. وأنا عارفة إنها بتسمع، عن ستات اتجننوا بسبب السحر والحسد.
وفي ليلة هادية، عملت حركة جننتها اكتر و اكتر خليت أميرة تشوف خيال واقف عند سرير ابنها.
أميرة اتجمدت من الرعب، ومن يومها مضاقتش طعم النوم. فضلت تشك في الكل، وتكلم نفسها وتصرخ، لحد ما جوزها شريف دخل عليها لقاها في الزاوية بتهمس بكلمات مش مفهومة، ولما قرب منها صرخت فيه ابعد عني.. إنت مش شريف!.
وبدأت تتصرف تصرفات أغرب، تخرج البلكونة بقميص النوم، تضحك بصوت عالي، وتعاكس الجيران. شريف اتجنن، افتكر إن مراته انحرفت وضاع شرفها. وفي ليلة سودة، نزل جرجرها من شعرها والشارع كله بيتفرج.
العيلة ملقيتش حل غير المصحة النفسية. وفعلا طلبوا الإسعاف و جت خدتها وانا كنت واقفة قدام البيت ببتسم وأنا شايفة العربية بتاخدها.. خلاص، ولادها منة وعبد الله بقوا ، بقوا ولادي.
و بعدها في يوم فاطمة كلمتني وهي بتعيط وتشتكي من أخوها، قلت لها تعالي اقعدي معايا. خلاص حماتي بقت زي العجينة في إيدي، وشريف بقى تحت رجلي عشان عياله. فاطمة جت وحكت لي مشاكلها، وأكلنا سوا ونيمنا العيال ونمنا وباتت معايا الليلة دى.
حلمت نفس الحلم، بس المرة دي قومت مفزوعة وبنادي على فاطمة.. ملقتهاش جنبي. قمت أدور عليها، لقيت تليفونها بيرن في الأوضة، يعني هي لسه في الشقة. جيت أفتح الباب عشان ادور عليها و فجأة سمعت صوتها وهي متغاظة بتقول إنت هتتجوزني رسمي إمتى يا سي شريف؟!! هتفضل متجوزني في السر لحد إمتى؟ ما خلاص مراتك اطلقت وخلصت، والخطة مشيت زي الفل وخلصنا منها!.
وقعت من طولي وأنا بسمع الحقيقة.. طلعوا متجوزين في السر واستغلوا كرهي لسلفتي عشان يخلصوا منها. 
ولما كملت و سمعت كلامهم عرفت الحقيقة المره ، عرفت إن شريف طول عمره بيغير من أخوه أحمد جوزي، وعشان كده من وقت ما اتجوزت وهو بيحط لي حبوب منع حمل عشان ما أخلفش وأفضل مكسورة!
حسيت إن الدنيا اسودت، أعز صاحبتي وسلفي هما اللي حرموني من الخلف وضيعوا حياتي واستغلوني عشان يحققوا خططهم خلوني أجري ورا الانتقام ..
منمتش طول الليل و فضلت افكر انتقم منهم ازاى و اصلح اللى عملته ازاى ؟!
قررت أنتقم من الاتنين. رحت لأميرة في المصحة وحسيت بالذنب لما شفتها منهارة، و طمنتها على ولادها و وعدتها إن ولادها هيرجعوا لها.
وبدأت فى خطتى ناحيه فاطمة و شريف و بدأت أوقع بينهم، خلتها تشك إن فيه علاقة بيني وبينه.
و بالليل قمت من جنب فاطمة وعملت نفسي بتكلم فى تليفون و هى سامعانى وانا بقول رايحة له، و دخلت أوضتى و لبست روب وحطيت برفان وقلت بصوت مسموع زمان شريف مستنيني على نار . 
وهى كل ده بتراقبنى من بعيد و متعرفش انى بخططلها هى و هو ..
نزلت وفتحت باب شقته بالمفتاح اللي معايا وسيبته موارب واستخبيت على السلم لحد ما اطمنت انها شافتنى و نزلت استخبيت عند حماتى واستنيت اشوفها هتعمل ايه .
فاطمة شافتي واتجننت، جرت على المطبخ جابت سكينة ودخلت عليه الأوضة وهو نايم و فكرت هتلاقينى و انا دخلت وراها بتسحب ، وفجأة وبكل قوتها ضربته بالسكينة لحد ما مات وهي بتصرخ وتضحك بهستيريا.
حماتي خرجت و قامت من النوم على الصرخه ولما شافت المنظر صوتت ، وساعتها فاطمة بصت لي آخر نظرة ورمت نفسها من البلكونة وغرقت في دمها.
البوليس جه و الناس اتلمت و بعد ما التحقيقات خلصت و القضيه اتقفلت ، وقفت جنب أميرة لحد ما رجعت عيالها من تاني. وفهمت معنى الحلم.. إن العار والوحدة كانوا بسبب الغدر اللي حواليا وأن اعز صاحبه ليا وأخو جوزى هما إللى كانوا بيدمروا حياتى .
وبعد مرور سنة، حماتي اتوفت، وأميرة بقت أعز صاحبة ليا، وقالت لي آسفة يا شوق، شريف كان بيوهمني إنك أجمل مني عشان يوقع بيننا.
و بعدها بفترة رجع جوزي أحمد من السفر و بعدها بشهرين.. تعبت ورحت للدكتور، وهناك سمعت الكلمة اللي كنت هموت وأسمعها مبروك يا مدام شوق.. إنتي حامل.
ربنا عوضني بتوأم، ولد وبنت، وعرفت إن ربك لا يظلم أحد.. ومن يومها حلفت إني أربيهم على الحب وعمري ما هفرق بينهم أبداً.